Poeti dhe autori i njohur palestinez, Mosab Abu Toha, është ndër fituesit e këtij viti të çmimit Pulitzer.

Abu Toha u shpërblye për një seri esesh në New Yorker që dokumentojnë jetën dhe vuajtjet e palestinezëve në Gaza, ku ai ka jetuar pothuajse gjatë gjithë jetës së tij.

“Sapo kam fituar një çmim Pulitzer për Komentim. Ky çmim le të sjellë shpresë, le të jetë një përrallë”, ka shkruar ai në X.

Esetë e tij portretizuan masakrën fizike dhe emocionale në Gaza, duke u vlerësuar nga juria për raportimin e thellë me intimitetin e kujtimin për të përcjellë përvojën palestineze të më shumë se një viti e gjysmë të luftës me Izraelin.

Abu Toha, 32 vjeç, u arrestua në vitin 2023 nga forcat izraelite në një pikë kontrolli teksa u përpoq të largohej nga shtëpia e tij në Beit Lahia në Gazën veriore me gruan e tij, Maram, dhe tre fëmijët e tyre të vegjël.

“Në paraburgimin izraelit, ushtarët më ndanë nga familja ime, më rrahën dhe më morën në pyetje”, shkroi ai.

Ai mundi të largohej dhe të arratisej në SHBA pasi miqtë jashtë vendit ushtruan presion për lirimin e tij.

Abu Toha shkroi për luftën e anëtarëve të familjes së tij për të gjetur ushqim në Gaza, krahasuar me kujtimet e shujtave të përditshme para luftës.

“Kam dëshirë të madhe të kthehem në Gaza, të ulem në tryezën e kuzhinës me nënën dhe babain tim dhe të bëj çaj për motrat e mia. Nuk kam nevojë të ha. Unë vetëm dua t’i shikoj përsëri,” shkroi ai.

Ai kujtoi se kishte parë fotografi të shkatërrimit të kampit të refugjatëve Jabalia në Gazën veriore, ku ai vizitonte rregullisht gjyshërit e tij dhe kreu shkollën. “I pashë fotot përsëri dhe përsëri, dhe një imazh i një varreze që rritet dhe rritet u formua në mendjen time,” shkroi ai.

Ai shkroi gjithashtu për dyshimet dhe poshtërimet me të cilat përballen ai dhe palestinezët e tjerë jashtë atdheut të tyre. Ai kujtoi se i kishte thënë një agjenti të TSA-së, i cili fshiu pëllëmbët e tij për eksploziv gjatë një qëndrimi në Boston: “Më rrëmbeu ushtria izraelite në nëntor, para se të më hiqnin rrobat… Sot, ju vini dhe më ndani nga gruaja dhe fëmijët e mi, ashtu siç bëri ushtria disa muaj më parë.”

New Yorker fitoi gjithashtu një Pulitzer për podcast-in e tij investigativ për vrasjen e civilëve irakianë nga ushtria amerikane dhe për fotografimin artistik për imazhet e Moises Saman që dokumentojnë fundin e diktaturës së Bashar al-Assad në Siri.

Fituesit e Pulitzer të këtij viti në art përfshijnë gjithashtu Percival Everett për romanin e tij “James”, një ri-imagjinim të Aventurave të Huckleberry Finn nga këndvështrimi i personazhit të titullit të skllavëruar dhe Branden Jacobs-Jenkins për dramën e tij “Purpose”, një dramë për një familje të shquar zezake që shkatërron veten nga brenda.