Në 27 vjetorin e masakrës së Srebrenicës në Bosnje Hercegovinë, kryetari i Aleancës për Ardhmërinë e Kosovës (AAK), Ramush Haradinaj ka kujtuar masakrën barbare nga regjimi i Millosheviqit mbi popullatën civile boshnjake.

Haradinaj në rrjetin social Facebook, ka shkruan se bashkëndjejmë me popullin e Bosnjës dhe e kupton dhimbjen e tyre, për faktin që nuk është vu drejtësia në vend për këto krime.

“Bashkëndjejmë me popullin e Bosnjës dhe e kuptojmë dhembjen e tyre! Masakra në Srebrenicë dhe vrasjet tjera masive në Ballkan, të kryera nga regjimi i Millosheviqit, mbeten njolla të pa shlyera në ndërgjegjen e njerëzimit, derisa nuk vendoset drejtësia”, ka shkruar Haradinaj.

Më 11 korrik të vitit 1995, më shumë se 8,000 burra dhe djem myslimanë të Bosnjës janë mbledhur dhe janë vrarë nga forcat serbe pranë qytetit lindor të Srebrenicës. Ka qenë kjo vrasja më e rëndë masive në Evropë që nga Lufta e Dytë Botërore.

Masakra në Srebrenicë është cilësuar si gjenocid edhe nga Gjykata Ndërkombëtare për Krime në ish-Jugosllavi, edhe nga Gjykata Ndërkombëtare e Drejtësisë.