Forumi Intelektual Europa 2030, përfaqësuar nga Prof. Asoc. Dr. Artan Nimani, ka reaguar ndaj vendimeve të fundit të Ministrisë së Arsimit, Shkencës, Teknologjisë dhe Inovacionit (MASHTI) për nënshkrimin e 11 anekseve të kontratave për ndërtimin e çerdheve. Këto kontrata, që kanë sjellë kosto shtesë prej 9 milionë euro për 20 tenderë, ngjallin dyshime mbi transparencën dhe menaxhimin e fondeve publike.

Nimani ka kërkuar një hetim të plotë nga prokuroria për të adresuar shqetësimet për shpërdorimin e fondeve, duke theksuar se vendimet e MAShTI-së nën drejtimin e Arbërie Nagavcit, duket se janë shoqëruar me mungesë mbikëqyrjeje dhe parregullsi në planifikim.

Ai nënvizoi rëndësinë e një mekanizmi monitorimi për kontratat publike dhe nevojën për politika më të rrepta të prokurimit, për të garantuar që fondet publike të përdoren me përgjegjësi dhe transparencë. /Kosova.info/