Izraeli ka kryer “një seri sulmesh” duke shënjestruar mbi 20 objekte ushtarake në Teheran, përfshirë objekte të lidhura me programin bërthamor dhe prodhimin e raketave të Iranit, njoftuan të mërkurën Forcat e Mbrojtjes së Izraelit (IDF).

Gjatë orëve të fundit, 60 aeroplanë luftarakë të Forcës Ajrore të Izraelit “kanë goditur qendra prodhimi armësh, objekte për prodhimin e centrifugave, si dhe qendra kërkimi dhe zhvillimi të projektit të regjimit iranian për zhvillimin e armëve bërthamore,” thuhet në deklaratën e IDF-së. “Këto objekte ishin të destinuara për t’i mundësuar regjimit iranian të zgjerojë shkallën dhe ritmin e pasurimit të uraniumit me qëllim zhvillimin e armëve bërthamore.”

Pavarësisht avancimit të ndjeshëm të pasurimit të uraniumit, Irani ka deklaruar vazhdimisht se programi i tij bërthamor është për qëllime paqësore dhe ka mohuar se po zhvillon një bombë atomike, raporton CNN.

Sulmet e fundit kanë shënjestruar gjithashtu “fabrika që prodhojnë materiale të papërpunuara dhe komponentë për montimin e raketave, si dhe objekte për prodhimin e sistemeve iraniane të mbrojtjes ajrore,” thuhet në deklaratë.