Kryeministri në detyrë i Kosovës, Albin Kurti, ka uruar Shtetet e Bashkuara të Amerikës me rastin e 250-vjetorit të shpalljes së pavarësisë duke vlerësuar rolin historik të Deklaratës së Pavarësisë dhe mbështetjen vendimtare të SHBA-së për kombin shqiptar.

Kurti theksoi se Deklarata e Pavarësisë e 4 korrikut 1776 nuk është vetëm një ngjarje historike, por një dokument me vlera universale që mbrojti të drejtat e patjetërsueshme të njeriut, si jeta, liria dhe kërkimi i lumturisë.

Në mesazhin e tij, ai rikujtoi mbështetjen e presidentit amerikan Woodrow Wilson për Shqipërinë pas Lufta e Parë Botërore duke veçuar takimin e Fan Noli me Wilsonin më 4 korrik 1918. Sipas Kurtit, parimet e vetëvendosjes të mishëruara në “14 Pikat e Wilsonit” kontribuuan në ruajtjen e shtetit shqiptar.

Po ashtu, ai nënvizoi se edhe Kosova mori mbështetje vendimtare nga SHBA-ja në rrugën drejt pavarësisë duke përmendur deklaratën e ish-presidentit George W. Bush në Tiranë më 10 qershor 2007, kur ai tha se “Kosova është e pavarur”.

Në fund të urimit, Kurti theksoi se garantimi i të drejtave të patjetërsueshme për të gjithë njerëzit mbetet një detyrë qytetëruese e njerëzimit dhe i uroi popullit amerikan një të ardhme të ndritur.

“Gëzuar 4 Korrikun, gëzuar përvjetorin e 250-të të Shteteve të Bashkuara të Amerikës!”, përfundoi ai. /Kosova.info/