Vdes njëra nga balerinat e para shqiptare, Esma Mulla

Ditën e sotme (e mërkurë) ka ndërruar jetë njëra nga balerinat e para kosovare, Esma Mulla.

Lajmi është konfirmuar nga Ministria e Kulturës, Rinisë dhe Sportit me anë të një postimi të publikuar në Facebook.

MKRS tutje thekson se populli shqiptar humbur një artiste të madhe që kontribuoi shumë në art e kulturë.

Postimi i plotë i MKRS-së (pa ndërhyrje):

Me pikëllim të thellë morëm lajmin se u nda nga jeta Esma Mulla, njëra prej balerinave të gjeneratës së parë të Kosovës.

Mulla ka qenë pjesë e Baletit në Kosovë qysh prej themelimit ndërsa me performancat e saj, ka shënuar kthesë jetike jo vetëm për baletin por për vrullin teatror dhe rritjen e vlerave kulturore në Kosovë. Ka qenë e njohur për një mori rolesh dhe shfaqjesh si “Legjenda mbi ngadhënjimin“,“Vallja pranverore“, “Bolero dhe Shtrausiana“.

Sot humbëm një person me vlera të çmuara që kontribuoi pareshtur për artin e vallëzimit dhe teatrit në veçanti, por edhe për kulturën e vendit tonë në përgjithësi.

Ngushëllime familjes së Esma Mullës, miqve dhe komunitetit artistik!

Go to TOP