Presidenti i SHBA-së, Donald Trump, ka mirëpritur kryeministrin hungarez Viktor Orbán në Shtëpinë e Bardhë.

Gjatë përshëndetjes në portikun e Shtëpisë së Bardhë, Trump u pyet nëse ka ende mundësi për një takim me Vladimir Putinin në Budapest.

Nga ana e tij, Trump u përgjigj se “ka gjithmonë një shans”.

Trump e quajti Orbánin lider të madh duke shmangur pyetjet e tjera, por duke theksuar se nëse takohet me Putinin, do të donte që Budapesti të ishte pika e takimit.

Ndërkaq, Orbán kërkoi përjashtim për Hungarinë nga sanksionet amerikane ndaj naftës ruse (Rosneft dhe Lukoil).

Trump tha se po e shqyrton këtë kërkesë, duke pranuar vështirësitë gjeografike të Hungarisë.

Orbán po pozicionohet si ndërmjetës mes Uashingtonit dhe Moskës, duke u përpjekur të ringjallë samitin Trump-Putin që u shty muajin e kaluar për shkak të mungesës së përparimit në bisedime.

Ky zhvillim vjen pas telefonatave Trump-Putin dhe takimeve të mëparshme, ku Budapesti u zgjodh fillimisht si vend neutral, por u pezullua për shkak të qëndrimit të ashpër rus.