Rrjeti i Grave të Kosovës (RrGK) sot ka dërguar një kërkesë në Ministrinë e Financave duke kërkuar integrimin e buxhetimit të përgjegjshëm gjinor në Kornizën Afatmesme të Shpenzimeve (KASH) 2027–2029, në përputhje me obligimet ligjore sipas Ligjit për Barazi Gjinore.

RrGK gjithashtu kërkon që KASH t’i nënshtrohet konsultimit publik, siç kërkohet nga korniza ligjore, duke siguruar një proces të hapur, gjithëpërfshirës dhe transparent me pjesëmarrjen aktive të shoqërisë civile.

Më poshtë mund ta lexoni letrën e plotë: 

I nderuar Minister i Financave, z. Murati,

I nderuar Sekretari i Përgjithshëm, z. Ahmeti,

I nderuar Drejtor i Departamentit të Buxhetit, z. Elmazi, 

Rrjeti i Grave të Kosovës (RrGK), me respekt, ju drejtohet për të kërkuar që buxhetimi i përgjegjshëm gjinor (BPGj) të integrohet në mënyrë të plotë dhe sistematike në Kornizën Afatmesme të Shpenzimeve (KASH) 2027–2029, si dhe që RrGK dhe organizatat e shoqërisë civile të përfshihen në mënyrë aktive në procesin e hartimit dhe konsultimit publik të këtij dokumenti kyç.

Duke u bazuar në Rregulloren (QRK) Nr. 17/2024 për Punën e Qeverisë së Republikës së Kosovës, theksojmë rëndësinë e konsultimit publik si mekanizëm thelbësor për të garantuar transparencë, llogaridhënie dhe përfshirje të qytetarëve në proceset vendimmarrëse. Në këtë kontekst, përfshirja e shoqërisë civile veçanërisht organizatave me ekspertizë në barazi gjinore dhe BPGj është vendimtare për të siguruar që prioritetet fiskale të reflektojnë nevojat e ndryshme të grave dhe burrave.

Në përputhje me Ligjin për Barazi Gjinore dhe zotimet e Kosovës ndaj Objektivave të Zhvillimit të Qëndrueshëm, veçanërisht Treguesit 5.c.1, si dhe me Shpenzimet Publike dhe Llogaridhënien Financiare (PEFA) Kornizën Plotësuese për Menaxhimin e Financave Publike të Përgjegjshme Gjinore, është thelbësore që KASH të përfshijë një Deklaratë Buxhetore Gjinore. Kjo deklaratë duhet të paraqesë qartë se si planifikimi fiskal afatmesëm adreson nevojat e grave, burrave, vajzave dhe djemve, si dhe të kontribuojë në monitorimin e progresit drejt barazisë gjinore.

Për më tepër, transparenca buxhetore kërkon publikimin e rregullt dhe të plotë të dokumenteve që lidhen me buxhetimin gjinor, përfshirë anekset e kërkuara nga qarkoret buxhetore. Deri më tani, mungesa e publikimit të qëndrueshëm të këtyre dokumenteve kufizon qasjen e publikut në informata dhe vështirëson vlerësimin e ndikimit të buxheteve në barazinë gjinore. Në këtë kuadër, RrGK kërkon nga Ministria e Financave (MF) që të ndërmarrë hapat në vijim:

·       – Të sigurojë përfshirjen e buxhetimit të përgjegjshëm gjinor në KASH 2027–2029 përmes një Deklarate të Buxhetit Gjinor të integruar.

·        – Të publikojë Deklaratën e Buxhetit Gjinor dhe të gjitha anekset përkatëse në mënyrë transparente dhe të qasshme për publikun.

·        – Të sigurohet që KASH-i i nënshtrohet një procesi të hapur, gjithëpërfshirës dhe të mirëstrukturuar të konsultimit publik, duke përfshirë RrGK-në dhe organizatat relevante të shoqërisë civile në fazat e hartimit dhe para miratimit.

Ne besojmë fuqishëm se këto masa do të kontribuojnë në përmirësimin e cilësisë, drejtësisë dhe gjithëpërfshirjes së planifikimit buxhetor në Kosovë, duke forcuar njëkohësisht përputhshmërinë me kornizat ligjore dhe angazhimet ndërkombëtare për barazi gjinore dhe qeverisje të mirë.

RrGK mbetet e gatshme të kontribuojë me ekspertizën e saj në këtë proces dhe të bashkëpunojë ngushtë me MF për të avancuar buxhetimin e përgjegjshëm gjinor në Kosovë.

Sinqerisht,

Igballe Rogova

Drejtore Ekzekutive

Rrjeti i Grave të Kosovës