Tre avionë luftarakë rusë kanë shkelur hapësirën ajrore të Estonisë dhe janë ndalur nga NATO, ka bërë të ditur aleanca ushtarake.

Ministria e Jashtme e Estonisë në Talin e dënoi incidentin si një akt “të paturpshëm” duke sqaruar se tre avionë MiG-31 hynë pa leje mbi Gjirin e Finlandës dhe qëndruan për rreth 12 minuta në hapësirën ajrore të një shteti anëtar të NATO-s.

Zëdhënësja e NATO-s, Allison Hart, tha se aleanca reagoi menjëherë dhe interceptoi avionët rusë, por nuk dha më shumë detaje lidhur me mënyrën e ndërhyrjes.

Nga ana tjetër, ushtria ruse deri më tani nuk ka komentuar publikisht mbi këtë rast.

Ky incident vjen në një kohë tensioni të lartë mes NATO-s dhe Rusisë duke ngritur shqetësime të reja për sigurinë ajrore dhe stabilitetin në rajonin e Baltikut. /Kosova.info/