Blerim Kuçi, së bashku me Gëzim Hazrolli, kanë vizituar kompaninë “BTC Costruzioni SRL” në Treviso të Italisë, në pronësi të sipërmarrësit të suksesshëm nga Semetishti i Suharekës, Refki Bytyqi.

Gjatë vizitës, Kuçi theksoi suksesin e kompanisë në sektorin e ndërtimit duke veçuar angazhimin e saj në vendosjen dhe mirëmbajtjen e pajisjeve solare – një fushë me rëndësi të veçantë për zhvillimin e qëndrueshëm.

Ai u shpreh i kënaqur që pa nga afër arritjet e mërgatës shqiptare në biznes duke e cilësuar këtë sukses si një shembull frymëzues për Kosovën.

Kuçi theksoi se institucionet duhet të angazhohen maksimalisht për të krijuar kushte që përvoja dhe investimet e bizneseve të tilla të transferohen edhe në Kosovë, në funksion të zhvillimit ekonomik dhe krijimit të vendeve të reja të punës.

Vizita u zhvillua në kuadër të angazhimeve për forcimin e lidhjeve me diasporën dhe promovimin e investimeve në vend. /Kosova.info/