Në Qendrën e Numërimit dhe Rezultateve ka filluar numërimi i fletëvotimeve që i takojnë votimit jashtë Kosovës. Komisioni Qendror i Zgjedhjeve ka bërë të ditur se fillimisht po numërohen votat nga votimi fizik i mbajtur në përfaqësitë diplomatike të Republikës së Kosovës.

Zëdhënësi i KQZ-së, Valmir Elezi, ka njoftuar se votimi është zhvilluar më 27 dhjetor 2025 në 29 përfaqësi diplomatike, të vendosura në 18 shtete të ndryshme të botës.

“Nga 19 mijë e 187 shtetas të regjistruar për këtë formë votimi, kanë votuar 16 mijë e 165 qytetarë apo mbi 84 për qind. Pas përfundimit të numërimit të votimit fizik në përfaqësitë diplomatike, do të vazhdojmë me numërimin e votave nga votimi përmes postës”, tha Elezi për RTK-në.

Zëdhënës i KQZ-së ka bërë të ditur se nga kutitë postare në Berlin dhe Bernë janë tërhequr mbi 28 mijë e 500 pako me fletëvotime, nga të cilat 27 mijë e 600 janë aprovuar për numërim. Mbi 950 pako janë refuzuar, kryesisht për shkak të mungesës së dëftesës së regjistrimit të votuesit.

“Ndërkohë, procesi i tërheqjes së zarfeve me fletëvotime me postë ende nuk ka përfunduar, ndërsa tërheqjet e fundit pritet të bëhen më 2 dhe 5 janar 2026”, shtoi ai.

Sa i përket numërimit brenda vendit, KQZ ka bërë të ditur se procesi i verifikimit dhe numërimit të votave është duke u zhvilluar në 11 komuna. Deri më tani, janë procesuar mbi 95 për qind e vendvotimeve në nivel vendi, ndërsa 32 komuna kanë përmbyllur plotësisht aktivitetet e numërimit.

Nga KQZ kanë theksuar se po punohet me intensitet për shpalljen sa më të shpejtë të rezultateve përfundimtare të zgjedhjeve të parakohshme parlamentare të mbajtura më 28 dhjetor 2025.