Pas dy ditëve të operacioneve intensive të gërmimit dhe zhvarrimit në Prishtinë, ekipet mjekoligjore të Institutit të Mjekësisë Ligjore dhe EULEX, me mbështetjen e Departamentit për Hetimin e Krimeve të Luftës në Policinë e Kosovës dhe Komisionit Qeveritar për Personat e Zhdukur, kanë arritur të lokalizojnë mbetjet mortore të tre personave të zhdukur gjatë luftës së fundit në Kosovë.

Mbetjet janë dërguar në Institutin e Mjekësisë Ligjore për ekzaminime të mëtejshme dhe për procesin e identifikimit përmes analizave shkencore.

Ministrja e Drejtësisë, Albulena Haxhiu, ka konfirmuar këtë zhvillim duke theksuar rëndësinë e bashkëpunimit institucional dhe të përkushtimit për zbardhjen e fatit të personave të zhdukur. Ajo gjithashtu ka falënderuar Komitetin Ndërkombëtar të Kryqit të Kuq për mbështetjen e vazhdueshme në këtë proces të dhimbshëm por të domosdoshëm.

Operacionet e kërkimit pritet të vazhdojnë edhe në lokacione të tjera në javët në vijim, si pjesë e përpjekjeve të vazhdueshme për të ndriçuar fatin e qindra qytetarëve që ende figurojnë të zhdukur nga lufta. /Kosova.info/