Depp thuhet se ka marrë ofertë prej 301 milionë dollarësh për t’u rikthyer në “Pirates of the Caribbean”

Aktori Johnny Depp nuk e ka në plan të rikthehet në filmin “Pirates of the Caribbean”, siç ka konfirmuar zëdhënësi i tij.

Mirëpo, disa media amerikane raportojnë se aktorit iu ofruan rreth 301 milionë dollarë për t’u rikthyer në xhirimet e franshizës së njohur.

Gjatë gjyqit për shpifje ndaj ish-gruas së tij, Amber Heard, hamshori hollivudian kishte deklaruar se nuk do të rikthehej në rolin e kapitenit Jack Sparrow, edhe nëse do t’i ofroheshin 300 milionë dollarë dhe një milion alpaka.

Një shumë e tillë në çdo rast do të ishte joreale, duke qenë se do të ishte më e lartë se buxheti i përgjithshëm për xhirimet e filmit.

Sidoqoftë, faqja Down Under ka cituar burimet të kenë thënë se aktori ka marrë një ofertë të tillë, porse nuk është tërhequr nga vendimi i tij për të mos u rikthyer – transmeton NY Post.

Depp për herë të fundit e luajtur rolin e Jack Sparrow në vitin 2017. Bëhet e ditur se tashmë janë në përgatitje dy vazhdime të tjera, por aktori nuk do të jetë në asnjërin prej tyre.

Kujtojmë që 59-vjeçari u përjashtua nga “Pirates of the Caribbean” pasi Amber Heard e akuzoi atë në vitin 2018 për abuzim fizik dhe seksual.

Go to TOP