Analisti dhe gazetari Berat Buzhala ka reaguar ashpër ndaj nënkryetares së Lidhjes Demokratike të Kosovës (LDK), Doarsa Kica, pas komenteve të saj në lidhje me bashkimin e kundërshtarëve të LDK-së. Në një postim të gjatë, Buzhala e akuzoi atë për qëndrime të dyfishta dhe për historikun e saj politik, duke kujtuar përfshirjen e saj në “revolucionin” e Albin Kurtit kundër LDK-së.

Buzhala paralajmëroi opozitën që të mos lejojë përçarje të brendshme në këtë moment kyç për Kosovën. Sipas tij, çdo zyrtar i opozitës që nis të kritikojë partitë opozitare, në vend se të kundërshtojë qeverinë, është një “kal i Trojës i VV-së” brenda partisë së tij.

Duke rikujtuar mbështetjen që i kishte dhënë LDK-së edhe në momentet e saj më të vështira, Buzhala shprehu zhgënjimin për qëndrimet e Kicës, duke e konsideruar të padrejtë pozicionimin e saj ndaj figurave të opozitës.

“Kosova është në udhëkryqin më të madh historik. Shumica shqiptare në Kosovë i votuan partitë opozitare, dikë më pak e dikë më shumë, por mesazhi ishte i qartë: Jo më këtë regjim,” theksoi ai.

Në fund, Buzhala la të kuptohet se nuk do të tolerojë etiketimin e tij si kundërshtar i LDK-së duke e mbyllur mesazhin me një paralajmërim: “Mos më shtini në atë kamp, se pasha Zotin dal. /Kosova.info/