Bizneset anëtare të Dhomës së Tregtisë dhe Industrisë së Kosovës kanë paralajmëruar masa të ashpra kundër vendimit të Zyrës së Rregullatorit për Energji (ZRRE) për liberalizimin e tregut të energjisë, nëse ky institucion nuk tërhiqet nga zbatimi i tij.

Në një reagim të ashpër, përfaqësues të komunitetit të biznesit kanë shprehur shqetësim të thellë për mënyrën e njëanshme dhe të papërgatitur me të cilën po implementohet ky vendim, që sipas tyre, rrezikon seriozisht stabilitetin financiar dhe vetë mbijetesën e shumë kompanive vendore.

“Sot është momenti i fundit për reflektim. Nëse ZRRE nuk merr vendim për shtyrjen e menjëhershme të këtij procesi, ne do të jemi të detyruar të ndërmarrim masa demokratike dhe ligjore për kundërshtimin e tij, përfshirë protesta të gjera dhe bllokim të aktiviteteve ekonomike,” thuhet në deklaratën e bizneseve.

Ata theksojnë se kërkesat për dialog dhe për rishqyrtim të vendimit janë shpërfillur në mënyrë të vazhdueshme nga ZRRE-ja, duke e rritur pasigurinë në treg dhe duke i shtuar barrën financiare sektorit privat, i cili tashmë ndodhet përballë sfidave të rënda ekonomike.

“Paralajmërojmë se përgjegjësia e plotë për çdo pasojë që mund të sjellë kjo krizë bie mbi ZRRE-në dhe institucionet që po lejojnë zbatimin e këtij vendimi të padrejtë,” thuhet më tej në reagim.

Dhoma e Tregtisë dhe Industrisë i ka bërë thirrje ZRRE-së dhe institucioneve përgjegjëse që të pezullojnë menjëherë vendimin dhe të përfshijnë në mënyrë të drejtpërdrejtë komunitetin e biznesit në çdo proces që ka ndikim në operimin dhe qëndrueshmërinë e tyre. /Kosova.info/