Kryeqyteti i Kosovës i është bashkuar përpjekjeve të UNDP Kosovo për të ngritur vetëdijen qytetare lidhur me rëndësinë e efiçiencës së energjisë dhe përfitimet afatgjata që vijnë nga investimi në këtë fushë.

Përfaqësues të Komunës së Prishtinës theksuan se investimi në izolimin e objekteve, përdorimin e pajisjeve me konsum të ulët energjie dhe aplikimin e teknologjive të qëndrueshme ndikon drejtpërdrejt në uljen e shpenzimeve për familjet, në reduktimin e ndotjes dhe në përmirësimin e cilësisë së ajrit në qytet.

Sipas tyre, kur qytetarët investojnë në efiçiencën e energjisë në shtëpitë e tyre, ata jo vetëm që kursejnë financiarisht, por kontribuojnë edhe në ndërtimin e një mjedisi urban më të qëndrueshëm dhe më të gjelbër për të gjithë.

Kjo nismë synon të fuqizojë bashkëpunimin mes institucioneve dhe komunitetit duke promovuar praktika të përgjegjshme energjetike dhe duke inkurajuar transformimin e Prishtinës në një qytet model për zhvillim të qëndrueshëm. Përmes përpjekjeve të përbashkëta, Prishtina po synon të ndërtojë një të ardhme më efiçiente, më të pastër dhe me cilësi më të lartë jetese për qytetarët e saj. /Kosova.info/