Ambasadori William Walker vizitoi lokalitetin arkeologjik Ulpiana Iustiniana Secunda, një nga qendrat më të rëndësishme të trashëgimisë kulturore dhe historike të vendit.

Gjatë vizitës, Ambasadori u njoh nga afër me historinë dhe rëndësinë e veçantë të këtij lokaliteti, si dhe me zbulimet më të fundit arkeologjike të realizuara gjatë verës së vitit 2023, që konsiderohen ndër zbulimet më domethënëse në arkeologjinë e vendit.

Ai u informua gjithashtu për hapat konkret të ndërmarrë nga Qeveria e Republikës së Kosovës për ruajtjen dhe promovimin e këtij thesari arkeologjik, përfshirë investimet në hulumtime arkeologjike me ekspertizë ndërkombëtare, procesin e shpronësimit të pronave dhe miratimin e Planit të Menaxhimit për lokalitetin.

Gjatë vizitës, Ambasadori u shoqërua nga këshilltarja e lartë e Ministrit Çeku, Nora Arapi Krasniqi, ushtruesja e detyrës së drejtoreshës së Institutit Arkeologjik, Zana Rama, dhe udhërrëfyesi Atdhe Prelvukaj. /Kosova.info/