Trajneri i Manchester Unitedit, Michael Carrick, është shprehur i kënaqur me paraqitjen e mesfushorit brazilian Andrey Santos, i cili bëri debutimin e tij me fanellën e “Djajve të Kuq” në humbjen 1-0 ndaj Wrexhamit në një ndeshje miqësore të zhvilluar në Helsinki.

Santos, 22 vjeç, i cili së fundmi firmosi kontratë me Manchester Unitedin deri në vitin 2031, luajti 45 minutat e para dhe la përshtypje pozitive në paraqitjen e tij të parë.

Braziliani kompletoi 93 për qind të pasimeve, krijoi dy raste për gol dhe regjistroi katër ndërhyrje të suksesshme në fazën mbrojtëse, duke treguar cilësitë që e bindën klubin ta transferojë.

Andrey Santos iu bashkua Manchester Unitedit pas një periudhe të suksesshme te Chelsea dhe huazimit te Strasburgu, ku realizoi 11 gola dhe dhuroi pesë asistime.

Pas ndeshjes, Carrick vlerësoi paraqitjen e mesfushorit, duke theksuar se ai krijoi një lidhje të mirë me bashkëlojtarët dhe tregoi potencial të madh.

“Ka shumë gjëra pozitive që mund të marrim nga kjo ndeshje. Mendoj se Andrey dhe Mason bënë disa gjëra shumë të mira dhe u kuptuan mjaft mirë në fushë. Pashë shumë sinjale pozitive”, tha Carrick.

Trajneri i Unitedit shtoi se skuadra është ende në fazën e përgatitjeve dhe ritmi i lojës do të përmirësohet me kalimin e javëve.

“Jemi vetëm në javën e parë të përgatitjeve, ndaj ato lëvizjet e shpejta dhe momentet që kërkojmë do të vijnë me stërvitjet. Andrey tregoi shenja të mira në ndeshjen e tij të parë dhe ishte bukur ta shihja me fanellën e kuqe”, theksoi ai.

Edhe pse Manchester United u mposht minimalisht nga Wrexhami, debutimi i Andrey Santosit ishte një nga pikat më pozitive për stafin teknik në këtë fazë të përgatitjeve verore.