Analisti Bleron Baraliu ka reaguar publikisht në mbrojtje të ministrit të Bujqësisë, Faton Peci, pas akuzave të ngritura ndaj këtij të fundit lidhur me tenderin për menaxhimin e mbetjeve. Në një deklaratë të drejtpërdrejtë, Baraliu e ka quajtur Pecin një “injorant të jashtëzakonshëm në politikë”, por ka theksuar se nuk e beson të jetë i përfshirë në afera korruptive apo veprime kriminale.

“Sado i paaftë të jetë në politikë, nuk kam asnjë dyshim që Faton Peci nuk është hajn, as matrapaz, e aq më pak të ketë vjedhur në tenderin e mbetjeve,” deklaroi Baraliu duke shtuar se ndaj tij është duke u zhvilluar një “gjueti e padrejtë”.

Ai kërkoi që institucionet e drejtësisë të lejohen të bëjnë punën e tyre pa presion publik apo linçim mediatik. “Le të hetojë prokuroria, e të vendosin gjykatat. Kosova duhet të këpusë traditën e shëmtuar të mos-prezumimit të pafajësisë para aktgjykimit,” tha ai. /Kosova.info/