Aktivisti i çështjes kombëtare Halil Geci ka reaguar ndaj akuzave të opozitës, e cila vazhdon ta paraqesë Qeverinë Kurti si anti-evropiane. Në një analizë të publikuar sot, Geci thotë se faktet flasin ndryshe: qëndrimet e Qeverisë Kurti janë tërësisht në përputhje me Rezolutën më të fundit të Parlamentit Evropian për Kosovën, të miratuar më 7 maj 2025.

Sipas Gecit, kjo përputhje rrëzon propagandën e opozitës që, në mungesë të një alternative konkrete, vazhdon të sulmojë kursin euroatlantik të qeverisë. Ai thekson se Parlamenti Evropian flet qartë dhe pa ekuivoke – duke përkrahur linjën që ka ndjekur Qeveria e Kosovës.

Në vijim, Geci ka publikuar një tabelë krahasuese ku renditen pikat kryesore të rezolutës evropiane dhe përputhshmëria e tyre me kërkesat e vazhdueshme të Qeverisë Kurti:

Pikat kyçe të Rezolutës së Parlamentit Evropian për Kosovën (7 maj 2025):

Marrëveshje përfundimtare me Serbinë: Kërkohet marrëveshje gjithëpërfshirëse, ligjërisht obliguese, dhe e bazuar në njohjen e ndërsjellë – një kërkesë që Qeveria Kurti e ka theksuar vazhdimisht.

Heqja e masave ndëshkuese ndaj Kosovës: Parlamenti Evropian bën thirrje për heqjen e menjëhershme të masave të BE-së duke përkrahur qëndrimin e qeverisë që këto masa janë të padrejta.

Mbështetje për anëtarësim në BE, KE dhe NATO: Përshëndetet aplikimi i Kosovës për BE dhe mbështetet fuqimisht anëtarësimi në Këshillin e Evropës dhe në Partneritetin për Paqe të NATO-s, që janë synime strategjike të Qeverisë Kurti.

Njohja nga pesë shtetet mosnjohëse: U bëhet thirrje pesë shteteve të BE-së që ende nuk e kanë njohur Kosovën që ta bëjnë këtë – kërkesë që qeveria e ka përsëritur në çdo forum ndërkombëtar.

Dënimi i sulmeve në veri: Rezoluta shpreh shqetësim për situatën në veri pas sulmit terrorist në Banjskë dhe incidentit në Ibër–Lepenc – një linjë e përbashkët me qeverinë që ka alarmuar për këto zhvillime.

Kritika ndaj Serbisë dhe lidhjes me Rusinë: Serbia kritikohet për mosndjekje penale të terroristëve të Banjskës dhe për lidhjet e saj me Rusinë; gjithashtu kërkohet rishqyrtimi i ndihmës financiare nga BE për Serbinë – një qëndrim që përkon me kërkesat e Prishtinës zyrtare.

Halil Geci përfundon se opozita po përpiqet të manipulojë opinionin publik me akuza boshe, ndërkohë që e vërteta qëndron e dokumentuar në dokumente ndërkombëtare – si kjo rezolutë që përkon plotësisht me linjën e Qeverisë së Kosovës. /Kosova.info/