Një grabitje e armatosur ka ndodhur mbrëmë në Mitrovicë, ndërsa pas të shtënave me armë një person ishte plagosur, e që më vonë ka ndërruar jetë. 

Grabitja e armatosur ka ndodhur rreth orës 22:30 në rrugën “Mbretëresha Teutë” në Mitrovicë.

Viktima i cili dyshohet se është shitësi i dyqanit, është dërguar me urgjencë në Spitalin e Mitrovicës, por si pasojë e plagëve të marra, nuk ka arritur të mbijetojë.

Vdekjen e tij e konfirmuar zëdhënësja e Spitalit të Mitrovicës, Nita Mustafa.

“Mund të konfirmoj se një person i plagosur që kishte ardhur për trajtim ka ndërruar jetë. Meqë tash ka ndodhur e gjithë ngjarja nuk mund të deklaroj informacione tjera”, ishte shprehur Mustafa.

Ndërkaq, policia ka njoftuar se janë identifikuar dhe arrestuar dy persona të dyshuar dhe është sekuestruar një armë.

Ndryshe, grabitjen me armë në rrugën “Mbretëresha Teutë” në Mitrovicë, e kishte konfirmuar edhe zëdhënësi i Policisë në rajonin e Mitrovicës, Avni Zahiti.

Nga hetimet fillestare bëhet e ditur se dy persona të dyshuar e të maskuar nën kërcënimin e armës kanë tentuar të grabitin viktimën i cili ndodhej në dyqanin e tij, ndërsa nga të shtënat me armë ai kishte mbetur i plagosur, e më pas kishte vdekur nga plagët e marra.

Ai bëri të ditur se janë identifikuar dhe arrestuar dy persona të dyshuar dhe është sekuestruar një armë.