Ministria e Arsimit ka bërë të ditur se që nga muaji janar i vitit të 2022 drejtoritë Komunale të Arsimit mund të shpallin konkursin për angazhimin e njëqind asistenteve për fëmijët me nevoja të veçanta. Njohës të fushës se arsimit po vlerësojnë së angazhimi i asistenteve është i domosdoshëm dhe iniciative e rëndësishme që duhet të përkrahet nga të gjithë.

Në shkollat e vendit fëmijët me nevoja të veçanta, mësimdhënësit dhe prindërit e tyre ende po vazhdojnë të përballen me mungesën e asistenteve për punën me fëmijët me nevoja të veçanta.

Udhëheqësja e Divizionit për arsimin e fëmijëve me nevoja të veçanta në Ministrinë e Arsimit, Lulavere Behluli, në një përgjigje për Radio Kosovën ka bërë të ditur se pas votimit të buxhetit për vitin 2022 nga Kuvendi i Kosovës, drejtoritë Komunale të Arsimit mund ti hapin konkurset për pranimin e njëqind asistenteve.

“Punësimi i asistenteve planifikohet të behet me buxhet të vitit 2022. Ne i kemi përgatitë informacionet për drejtoritë komunale të arsimit rreth konkursit. Nga janari i vitit 2022 komunat mund të shpallin konkurset për pranimin e asistenteve për fëmijët me nevoja të veçanta.” 

E, njohësi i çështjeve të arsimit Rinor Qehaja nga Instituti “Edguard” i tha Radio Kosovës së angazhimi i asistenteve është i domosdoshëm dhe duhet të përkrahet nga të gjitha institucionet.

“Numri i asistenteve duhet të jetë në proporcion më numrin e nxënësve me nevoja te veçanta. Angazhimi i asistenteve është iniciative e rëndësishme që duhet të përkrahet me zhvillim të vazhdueshme profesional të po të njëjtëve.”

Ministria e Arsimit, ka bërë të ditur që angazhimi i asistenteve për fëmijët me nevoja të veçanta do të vazhdoj edhe për tri vite të tjera. 

Mungesa e shërbimeve për nxënësit me nevoja të veçanta dhe mungesa e asistenteve në shkollat publike ka sjell shumë vështirësi dhe ngecje në nxënie për fëmijët me nevoja të veçanta. Numri i vogël i asistentëve që punojnë aktualisht nëpër disa shkolla, paguhen nga prindërit dhe ndihmohen nga shkollat të cilat përkrahen nga organizata të ndryshme.