Floridës i ka mbetur fare pak kohë për t’u përgatitur për goditjen e fuqishme të uraganit Milton, i cili pritet të jetë një nga më shkatërruesit që ka goditur ndonjëherë bregun e Gjirit. Më shumë se një milion banorë në zonat bregdetare janë nën urdhra evakuimi, ndërsa rrugët dhe stacionet e karburantit po përballen me bllokime të mëdha.

Milton, i cili ka kaluar nga Kategoria 1 në Kategorinë 5 në më pak se 24 orë, pritet të godasë zonën metropolitane të Tampa Bay, ku banojnë mbi tre milion njerëz. Presidenti Joe Biden dhe kryetarja e Tampas, Jane Castor, kanë paralajmëruar banorët që të largohen sa më parë, pasi stuhia është shumë e rrezikshme për jetën.

Përpos evakuimit të detyruar, shumë kompani, përfshirë linjat ajrore, parqe të njohura dhe kompanitë e energjisë, kanë ndaluar operacionet e tyre për shkak të rrezikut të madh. Po ashtu, 17% e stacioneve të karburantit në Florida kanë mbetur pa furnizime për shkak të kërkesës së madhe.

Shkencëtarët theksojnë se temperatura të ngrohta të sipërfaqes së detit janë faktori kryesor për intensifikimin e shpejtë të stuhisë, duke e lidhur këtë me efektet e ndryshimeve klimatike. Banorëve u bëhet thirrje të mos rrezikojnë jetën dhe të largohen menjëherë nga zonat e prekura.