Ligjvënësi rus me ndikim Konstantin Kosachev, duke komentuar një propozim armëpushimi të negociuar mes zyrtarëve amerikanë dhe ukrainas, tha të mërkurën se çdo marrëveshje do të ishte sipas kushteve të Moskës, jo të Uashingtonit.

“Rusia po bën përparim (në Ukrainë) dhe për këtë arsye do të jetë ndryshe me Rusinë,” tha Kosachev, kryetar i komitetit të çështjeve ndërkombëtare të Këshillit të Federatës, dhoma e lartë e parlamentit rus, në një postim në Telegram. Siç shtoi ai, “çdo marrëveshje, me gjithë kuptimin e nevojës për kompromis, janë në kushtet tona, jo me ato amerikane”.

“Dhe kjo nuk është mburrje, por një kuptim se marrëveshjet e vërteta janë ende duke u shkruar atje, në vijën e frontit. Të cilat ata duhet ta kuptojnë edhe në Uashington,” përfundoi ai.

Kujtojmë, dje Departamenti Amerikan i Shtetit njoftoi se Uashingtoni do të fillojë menjëherë dërgimin e inteligjencës dhe do të vazhdojë ndihmën e sigurisë në Ukrainë, ndërsa nga ana tjetër Ukraina ra dakord për një armëpushim të menjëhershëm 30-ditor.

Deklarata e Departamentit të Shtetit, e raportuar nga Reuters, vjen pas një takimi të gjatë mes zyrtarëve të lartë amerikanë dhe ukrainas sot në Arabinë Saudite. Takimi në Jeddah zgjati më shumë se tetë orë.

Ukraina ka rënë dakord të pranojë një propozim të SHBA-së për një armëpushim të menjëhershëm 30-ditor dhe të ndërmarrë hapa drejt rivendosjes së paqes së qëndrueshme pas pushtimit rus, thanë SHBA-të dhe Ukraina në një deklaratë të përbashkët të martën.

“Shtetet e Bashkuara do t’i përcjellin Rusisë se reciprociteti është çelësi për arritjen e paqes”, thuhet në deklaratë.