Zëvendëskryeministrja e Kosovës për të Drejtat e Njeriut dhe Çështjet e Komuniteteve Jo-Shumicë, Emilija Redžepi, ka reaguar ashpër ndaj një deklarate të liderit të LDK-së, Lumir Abdixhiku, të cilën e cilëson si përjashtuese dhe të rrezikshme për rendin demokratik dhe multietnik të Kosovës.

Duke iu referuar deklaratës së Abdixhikut për formimin e qeverisë vetëm me parti shqiptare, Redžepi tha se një qasje e tillë përjashton komunitetet jo-shumicë nga dialogu politik dhe përfaqësimi institucional, duke e quajtur atë “e turpshme, e papranueshme dhe jashtëzakonisht e rrezikshme”.

“Nuk do të lejojmë që Kosova të reduktohet në një shtet të vetëm një grupi etnik. Ajo është dhe do të mbetet shtëpi për të gjithë qytetarët e saj – shqiptarë, boshnjakë, turq, romë, ashkalinj, egjiptianë, goranë e serbë,” theksoi Redžepi, e cila është njëherësh kryetare e Partisë së Re Demokratike dhe boshnjakja më e votuar në zgjedhjet e fundit.

Sipas saj, retorika që injoron komunitetet jo-shumicë është regresive, shoviniste dhe bie ndesh me Kushtetutën e Kosovës. Ajo shtoi se nuk do të heshtë përballë përpjekjeve për të heshtur barazinë dhe përfaqësimin.

“Është tronditëse që një deklaratë e tillë vjen nga një lider i ri që duhej të përfaqësonte vizionin bashkues e modern për Kosovën,” tha Redžepi, duke theksuar se ndërtimi i një shteti të barabartë për të gjithë qytetarët nuk është negociueshëm. /Kosova.info/