Një i dyshuar për vrasjen e një shtetasi rus është ndaluar, tha të enjten kryeministri polak Donald Tusk, pasi një artist kritik ndaj Presidentit Vladimir Putin u qëllua për vdekje në Poloninë lindore këtë javë.

I dyshuari u ndalua nga policia në bashkëpunim me Agjencinë e Sigurisë së Brendshme të Polonisë, tha Tusk në X, duke shtuar se burri po përdorte një pasaportë gjeorgjiane. Policia lokale në Lublin tha se dokumenti i përkiste një burri 36-vjeçar.

Prokurorët kanë thënë se viktima, e identifikuar si Robert Kuzovkov dhe i njohur gjithashtu si Semyon Skrepetsky, u godit nga pesë plumba, përfshirë një në kokë. Dy bjellorusë janë ndaluar gjithashtu në lidhje me vrasjen në qytetin Biala Podlaska, por nuk janë akuzuar, raporton Reuters

Kuzovkov ishte i njohur për punën e tij kritike ndaj autoriteteve të Rusisë dhe kohët e fundit kishte organizuar një protestë në Berlin. Autoritetet po punojnë për të identifikuar personin që urdhëroi vrasjen, tha Tusk, pa dhënë detaje të mëtejshme.

Më herët të enjten, zëvendësministri i Punëve të Jashtme Wladyslaw Bartoszewski i tha Radio Zet se “çeçenët, të cilët ky burrë i kishte sulmuar rëndë, janë gjithashtu potencialisht të dyshuar”.