Trajneri i Austrisë, Ralf Rangnick, ka lavdëruar përfaqësuesen e Jordanisë pas paraqitjes së saj në debutimin historik në Kupën e Botës 2026, pavarësisht fitores 3-1 të austriakëve në ndeshjen e së martës.

Austria hasi vështirësi të mëdha përballë një Jordanie të guximshme dhe organizuar mirë, e cila për herë të parë po luan në skenën më të madhe të futbollit botëror. Skuadra e drejtuar nga Rangnick u desh të presë deri në minutat shtesë për të siguruar fitoren, të vulosur nga një penallti e shënuar nga Marko Arnautovic.

Tekniku austriak pranoi se kundërshtari kishte befasuar me nivelin e lojës së treguar.

“Jordania bëri një punë fantastike gjatë gjithë ndeshjes. E dinim që do të ishte një kundërshtar i vështirë, por sot ata treguan një futboll shumë të guximshëm dhe i tejkaluan pritshmëritë tona,” u shpreh Rangnick.

Ai shtoi se Austria nuk ishte domosdoshmërisht favorite, siç ishte perceptuar para ndeshjes, duke theksuar se niveli i ekipeve në Kupën e Botës është gjithnjë e më i barabartë.

Rangnick gjithashtu përshëndeti zgjerimin e turneut në 48 skuadra, duke theksuar se kjo u jep mundësi më shumë shteteve të marrin pjesë dhe të tregojnë vlerat e tyre në skenën ndërkombëtare.

Sipas tij, ndeshje të tilla tregojnë se nuk ka më kundërshtarë të lehtë në futbollin modern, duke përmendur edhe rezultate të tjera surprizë në turne që dëshmojnë rritjen e nivelit global të lojës.