Këngëtarja dhe modelja e njohur shqiptare, Morena Taraku, i ka të rralla reagimet publike.

Megjithatë së fundmi, ajo ka shkruar e revoltuar në InstaStory në lidhje me një nga deklaratat e fundit të kryeministrit Edi Rama në samitin e përbashkët në takimin me Zoran Zaev dhe Aleksandar Vuçiq.

Deklarata për ndihmat që Serbia ia dhuroi Shqipërisë në kohën e tërmetit ka revoltuar këngëtaren dhe modelen, e cila nuk ka hezituar që t’i drejtohet kryeministrit shqiptar me disa rreshta në InstaStory.

“Nuk përzihem fare me politikën e aq më pak shoh lajme andej. Por këtë që lexova tani më preku mua e le më gjithë ata kosovarë të tjerë që ndihmuan në Shqipëri gjatë tërmetit! Mirë kam një pyetje: Kamionët që nisën mërgimtarët tanë nga Evropa, tendat, ushqimet, veshmbathjet, e që gjithat zhdukeshin ende pa arritur në vendin që prisnim ne! A thua ku mbetën apo i paskan zhdukur me qëllime që kinse Kosova nuk paska ndihmuar asgjë”, ka shkruar fillimisht Morena

.

Tutje, ajo ka vazhduar të shkruajë me shqetësim se si askush nga artistët shqiptarë nuk u dekorua me mirënjohje për kontributin e vet gjatë periudhës së vështirë kur Shqipëria u godit nga tërmetet.

Ajo përmend faktin se si në atë kohë erdhi enkas nga Turqia dhe bëri me shtëpi një familje nevojtare.

“Unë erdha nga Turqia, lash babanë e sëmurë, edhe pse tërmetet i kam fobi. Këtë po ta thyem ty Edi Rama. Mirë e bëre serbin më të dashur se kosovarin, nuk çuditem fare. Por mos vallë folët ndonjëherë ose mos na dekoruat me ndonjë falënderim neve artistëve kosovarë që qëndruam ditë e natë zgjuar atje ku njerëzit e Qeverisë tënde as që kishin qenë ndonjëherë! Mirë! Po shtëpinë që unë Morena Taraku ndërtova në Kameras, s’ke dëgjuar? Jo, sepse po të dëgjoje me siguri s’do thoje serbët erdhën të parët. Por ja që ne ndihmuam se ju kemi borxh vëllezërve tanë”, ka shkruar Morena.

E krejt për fund, ajo e ka mbyllur revoltën e saj me një mesazh, duke cituar se ndihma duhet vlerësuar e jo hedhur poshtë.

“Mos moho njerëzinë, por vlerësoje atë”, ka shkruar Taraku.

Një reagim të fortë publik për marrëveshjen e fundit “Open Balkan” që Shqipëria lidhi me Maqedoninë e Veriut dhe Serbinë, e ka bërë edhe këngëtarja e njohur shqiptare, Besa Kokëdhima, duke i kërkuar falje publike popullit të Kosovës për vendimet që kryeministri i saj po merr.