Kryeministri në detyrë Albin Kurti, ka mirëpritur në Prishtinë sopranon me famë botërore Ermonela Jaho, pak para koncertit të saj gala në kryeqytet.

Me këtë rast, Kurti theksoi rëndësinë e këtij eventi si një hap i madh përpara për Institucionin e Operës në Kosovë, i themeluar në vitin 2022.

“Kosova është edhe vend i operës. Sepse zëri këtu gjithmonë ka gjetur shtëpi bujare që dëgjon,” u shpreh Kurti, duke përmendur rrugëtimin historik të operës në vend që nga kompozimi i parë i Rauf Dhomi “Goca e Kaçanikut”, e deri te koncerti i sotëm gala.

Ai e cilësoi pjesëmarrjen e Ermonela Jahos si një mbështetje të çmuar për këtë proces ndërtimi kulturor dhe artistik, duke falënderuar sopranon për përulësinë dhe dashurinë me të cilat i quan Kosovën dhe Shqipërinë shtëpitë e saj.

“Kosova nuk po e pret operën. Kosova po e ndërton atë,” përfundoi Kurti. /Kosova.info/