Presidenti i Francës, Emmanuel Macron, të mërkurën denoncoi “gënjeshtrat” e përhapura nga Qeveria ruse për të justifikuar luftën në Ukrainë, por ai tha se do të mbetet në kontakt me presidentin rus, Vladimir Putin, dhe do të tentojë që të arrijë një armëpushim.

Macron fajësoi Kremlinin për luftën.

“Ai ka tradhtuar angazhimet e tij ndërkombëtare një nga një dhe presidenti Putin zgjodhi luftën”, tha Macron gjatë një fjalimi drejtuar kombit.

“Kjo luftë nuk është konflikt midis Perëndimit dhe Rusisë, siç do të donin disa të besonin. Nuk ka asnjë bazë të NATO-s në Ukrainë. Këto janë gënjeshtra. Rusia nuk është sulmuar, Rusia është agresori. Kjo luftë nuk është kundër nazizmit, kjo është gënjeshtër”, tha Macron.