Ish-zëvendësministri i Drejtësisë, Blerim Sallahu, ka sqaruar se bazuar në nenin 86 të Kushtetutës dhe në aktgjykimin KO29/11 të Gjykata Kushtetuese e Kosovës, vendi nuk shkon në zgjedhje automatike nëse Presidenti nuk zgjidhet deri më 4 mars 2026 për shkak të mospjesëmarrjes së deputetëve në seancë plenare dhe në votim gjatë tri raundeve të përcaktuara me Kushtetutë.

Sipas tij, zgjedhjet e reja mund të shpallen vetëm nëse, pas ezaurimit të tri votimeve, asnjë kandidat për President nuk arrin të marrë së paku 80 vota në dy raundet e para dhe së paku 61 vota në raundin e tretë.

Sallahu thekson se nëse Presidenti zgjidhet pas 4 marsit 2026, mbi bazën e numrit të votave të përcaktuara në nenin 86, një zgjedhje e tillë do të ishte kundërkushtetuese.

Ai vlerëson se për të parandaluar papërgjegjësinë e deputetëve përmes mospjesëmarrjes dhe mosvotimit në seancë plenare duke cenuar edhe aktgjykimet e mëhershme lidhur me obligimin e tyre për të votuar, procesi i zgjedhjes së Presidentit duhet të dërgohet menjëherë në Gjykata Kushtetuese e Kosovës, me kërkesë për masë të përkohshme për pezullimin e afatit kushtetues.

Sipas tij, Gjykata nuk ka alternativë tjetër përveçse t’i obligojë sërish deputetët të qëndrojnë në sallë dhe të votojnë “pro”, “kundër” apo “abstenim” duke iu referuar aktgjykimeve të mëparshme KO 193/25 dhe KO-196/25, si dhe Opinionit të Komisionit të Venecias CDL-AD(2017)003 të Komisioni i Venecias. /Kosova.info/