Në prag të Kuvendit Zgjedhor të Lidhjes Demokratike të Kosovës (LDK), kandidati për kryetar të kësaj partie, Florim Zeqa, ka drejtuar një mesazh të fuqishëm dhe thirrje publike ndaj delegatëve duke e cilësuar ditën e sotme si moment historik për të ardhmen e LDK-së.

“Sot shkruhet historia e LDK-së”, thekson Zeqa duke u bërë thirrje delegatëve që të shfrytëzojnë, sipas tij, rastin historik për ta bërë “kthesën e madhe” në parti. Ai kërkon shkarkimin e kryetarit aktual, të cilin e cilëson si të dështuar, si dhe votim të fshehtë dhe demokratik për hapjen e një epoke të re në LDK.

Zeqa prezantohet si veprimtar i orëve të para të LDK-së dhe si përfaqësues i frymës rugoviane duke u zotuar për rikthimin e vlerave themelore mbi të cilat është ndërtuar partia. Ai e përshkruan veten si “shpirt të pastër me vizion të qartë rugovian” duke kërkuar mbështetjen e delegatëve për drejtimin e LDK-së.

Sipas tij, kandidatura e tij përfaqëson dashurinë e pakufishme për LDK-në, dijen, guximin dhe forcën e veprimit, si dhe mbështetjen e gjerë të elektoratit rugovian, si në Kosovë ashtu edhe në mërgatë.

“Të dashur delegatë, në dorën tuaj është fati dhe e ardhmja e LDK-së. Sot do të hyni në histori – hyni për të mirë e jo për të keq”, përfundon mesazhin e tij Florim Zeqa. /Kosova.info/