Duke filluar nga data 5 maj 2025, qytetarët e Kosovës që mbajnë pasaportë kombëtare të vlefshme nuk do të kenë më nevojë për vizë për të hyrë në Shtetin e Izraelit për qëllime turistike. Izraeli ka vendosur ta përfshijë Kosovën në listën e vendeve të përjashtuara nga viza duke lehtësuar kështu lëvizjen dhe shkëmbimet turistike ndërmjet dy vendeve.

Megjithatë, për të hyrë në territorin izraelit, të gjithë shtetasit e Kosovës do të jenë të detyruar të pajisen me një Autorizim Elektronik për Udhëtim (ETA-IL). Ky dokument duhet të merret të paktën 72 orë para nisjes së udhëtimit drejt Izraelit dhe vlen si leje hyrjeje për qëndrim deri në 90 ditë për çdo vizitë.

pic.twitter.com/u3gNps5WOm

— Tammy Ziv 🇮🇱 (@AmbTammyZiv) April 30, 2025

Aplikimi për ETA-IL është një proces i thjeshtë dhe mund të bëhet online. Pas miratimit, udhëtarët mund të hyjnë në Izrael pa pasur nevojë për një vizë fizike në pasaportën e tyre.

Autoritetet izraelite theksojnë se udhëtarët që nuk do të kenë një ETA-IL të vlefshme ose vizë nuk do të lejohen të udhëtojnë drejt vendit. Kjo masë synon të përshpejtojë procesin e kontrollit kufitar dhe të rrisë sigurinë për të gjithë vizitorët.

Ky vendim përbën një hap të rëndësishëm në forcimin e marrëdhënieve mes Kosovës dhe Izraelit duke i hapur rrugë më shumë mundësive për bashkëpunim në fushën e turizmit dhe ekonomisë. /Kosova.info/