Analisti Shenoll Muharremi ka komentuar vendimin e PDK-së për të vendosur “vija të kuqe” ndaj një koalicioni me LVV-në, duke e cilësuar këtë si një veprim të pazakontë dhe të kundërt me qëndrimet e tyre të mëparshme. Ai argumenton se justifikimi i PDK-së – se programet e tyre nuk mund të harmonizohen me ato të LVV-së – nuk qëndron.

Sipas Muharremit, PDK ka elemente të politikave të majta në programin e saj, si krijimi i “gjykatës së punëtorëve”, rritja e pagave në sektorin publik dhe rritja e pensioneve. Në anën tjetër, LVV, ndonëse e majtë, ka në zotimet e saj politika tipike të djathta, si investimet miliardëshe për bizneset prodhuese dhe projektet në Brezovicë.

Duke analizuar këto pika, ai thekson se programet e dy partive mund të harmonizohen lehtësisht dhe se dallimet nuk janë aq të mëdha sa të justifikojnë përjashtimin e një bashkëpunimi të mundshëm. Muharremi madje ofron ta bëjë këtë harmonizim “pro bono” duke ironizuar paaftësinë e partive për të gjetur pika të përbashkëta. /Kosova.info/