Koalicioni për Familjen premtoi që do t’i kushtojë rëndësi të veçantë nënave të reja, në tubimin elektoral të radhës në Fushë Kosovë.

Bartësi i listës, Eman Rrahmani, tha se koalicioni që përfaqëson do të jetë zëri i qytetarëve në Kuvendin e Kosovës, derisa garantojë përfaqësim të dinjitetshëm në shërbim të interesave të qytetarëve.

“Bëhuni pjesë e angazhimit të përbashkët. Do të mbrojmë familjen”, tha Rrahmani, teksa premtoi kushte më të mira shëndetësore.

Partneri i koalicionit, Ferid Agani, tha se zotimet e këtij koalicioni përfshijnë fusha të ndryshme, ku ndër të tjera tha se rëndësi të veçantë do t’u kushtohet nënave të reja, duke i mbështetur financiarisht.

“Koalicioni është themeluar që vlerat e familjeve tona të zënë vend në Kuvendin e Kosovës. Zotimet tona janë në fusha të ndryshme. Rëndësi të veçantë do t’ju kushtojmë nënave të reja, duke i mbështetur financiarisht. Vëmendje do t’ju kushtojmë fëmijëve, që në shkolla të kenë arsimim të mirëfilltë”, ka thënë Agani.