Në të ardhmen, një burrë në Gjermani do të mund të marrë automatikisht kujdestarinë për fëmijën pas njohjes së atësisë, nëse prindi tjetër nuk e kundërshton brenda një muaji. Kjo është një nga pikat e reformës së ligjit të familjes, që Ministri Federal i Drejtësisë, Marco Buschmann, synon ta miratojë së shpejti.

E drejta e fëmijëve forcohet

Gjithashtu, reforma parashikon që pozita juridike e fëmijëve të forcohet. Fëmijët e prindërve të ndarë do të kenë të drejtën, që nga mosha 14 vjeç, të kërkojnë rishikimin e një vendimi për kujdestarinë. Po ashtu, reforma përforcon të drejtën e fëmijëve për të njohur origjinën e tyre, veçanërisht në rastet e adoptimit.

Reforma pritet të shqyrtohet këtë vjeshtë, por disa parti të koalicionit qeverisës duan ndryshime shtesë. Për të përshpejtuar procesin, Buschmann ka ftuar përfaqësues të autoriteteve juridike në një takim më 25 tetor.

Adoptimi dhe njohja e dy nënave

Reforma sjell lehtësira për ata që duan të birësojnë fëmijë, duke përfshirë çiftet e pamartuara. Gjithashtu, çiftet lezbike nuk do të duhet të kalojnë procesin e adoptimit, nëse njëra nga partneret lind fëmijë me ndihmën e dhurimit të spermës. Kështu, ligji do të njohë menjëherë dy nëna për fëmijën që lind.

Kujdestaria dhe prindërit dhunues

Për baballarët, reforma sjell mundësi për reduktim të pagesave të alimentacionit, nëse kujdesen për fëmijën më shumë se 29% të kohës. Nëse prindërit kanë mosmarrëveshje për çështje të përditshme, ai që kalon më shumë kohë me fëmijën do të marrë vendime. Ndërkaq, reforma synon të forcojë mbrojtjen ndaj prindërve dhunues, duke lejuar gjykatat të ndërpresin kontaktin e tyre me fëmijët, nëse është e nevojshme.

Këto ndryshime pritet të sjellin një riorganizim të rëndësishëm të strukturës familjare dhe mbrojtjes së fëmijëve në Gjermani.