Vrasja në vitin 2018 me eksploziv në Gjakovë, lirohet nga akuzat Dodë Gjikolaj

Gjykata Themelore në Gjakovë ka shpallur aktgjykim lirues ndaj të pandehurit Dodë Gjikolaj, i cili sipas Prokurorisë Themelore akuzohet për veprën penale “vrasje e rëndë” dhe “mbajtja në pronësi, kontroll ose posedim të paautorizuar të armëve”.

Sipas njoftimit, trupi gjykues pas mbajtjes së 16 seancave gjyqësore, dëgjimit të 10 dëshmitarëve, administrimit dhe analizimit të të gjitha provave personale dhe materiale, këqyrjes dhe rikonstruksionit të vendit të ngjarjes si dhe analizimin e 3 ekspertizave, dy prej të cilave vendore dhe një ndërkombëtare, ka ardhë në përnfundim se nuk është vërtetuar se i akuzuari ka kryer veprat penale si në aktakuzë.

“I pandehuri D.Gj., akuzohej se “me datën 14 tetor 2018 rreth orës 07:48 minuta në fshatin Smolicë të Gjakovës, ka privuar nga jeta tani të ndjerin H.A. nga fshati Smolicë i Gjakovës, dhe me atë rast vë në rrezik jetën e të dëmtuarit A. K., në atë mënyrë që ditën kritike i pandehuri D.Gj., rreth orës 02.30 minuta ka vendosur një materie eksplozivi në shtyllën e dyerve të oborrit të shtëpisë tani së të ndjerit H.A., në momentin kur tani i ndjeri rreth orës 08:02 minuta, del nga dyert e oborrit e pikërisht kur tenton të mbyll dyert, i pandehuri nga një largësi e panjohur, përmes teledirigjimit e aktivizon atë materie eksplozivi dhe nga shpërthimi, mbetet në vend i vdekur H.A., dhe lëndime trupore merr i dëmtuari A.K.””, thuhet në njoftimin e gjykatës.

Tutje, gjykata tha se kundër këtij aktgjykimi, palët kanë të drejtë ankese në afat prej 30 ditëve nga dita e praniit të aktgjykimit.

Go to TOP