Presidenti amerikan, Donald Trump, deklaroi të martën se nuk ka diskutuar me kryeministrin britanik, Keir Starmer, për mundësinë e njohjes së shtetit palestinez – vetëm disa orë pasi Starmer sinjalizoi se Mbretëria e Bashkuar mund të ndërmarrë një hap të tillë. Trump shtoi se Shtetet e Bashkuara “nuk kanë asnjë qëndrim” mbi këtë çështje, shkruan Politico.

“Ne nuk e kemi diskutuar këtë. Nuk kemi ndonjë qëndrim për të,” u shpreh Trump nga bordi i avionit presidencial Air Force One. “Do të dërgojmë shumë para në atë zonë që të kenë ushqim.”

Komentet e Trump vijnë një ditë pasi ai e pranoi publikisht se në Rripin e Gazës ka “uri të vërtetë”, në kundërshtim me qëndrimin e kryeministrit izraelit, Benjamin Netanyahu, i cili pretendon se “nuk ka uri” në atë zonë të shkatërruar nga lufta, shkruan Politico.

Të martën në mëngjes, Starmer i bashkohet presidentit francez, Emmanuel Macron, në zotimin për të njohur një shtet palestinez para Asamblesë së Përgjithshme të OKB-së në shtator, nëse Izraeli nuk ndërmerr “masa të qenësishme” për t’i dhënë fund krizës humanitare në Gaza.

Qëndrimi i ashpër i liderëve evropianë vjen pas një raporti të mbështetur nga Kombet e Bashkuara, nga autoriteti global për krizën ushqimore, i cili paralajmëroi se në Gaza po ndodh një “skenar i urisë ekstreme”.

Ndërkohë, Trump u përball me thirrje për të ushtruar presion ndaj Izraelit që të gjejë një zgjidhje afatgjatë për krizën humanitare. Ai i hodhi poshtë këto kërkesa, duke thënë se një veprim i tillë do të ishte në favor të Hamasit.

“Ti mund të thuash se po i shpërblen ata, po i shpërblen Hamasin nëse vepron kështu. Nuk mendoj se ata duhet të shpërblehen. Nuk jam në atë kamp, për të qenë i sinqertë,” tha ai.

Pavarësisht deklaratave të tij, administrata Trump ka tentuar të minimizojë përplasjet me qeverinë izraelite. Ambasadori amerikan në Izrael, Mike Huckabee, tha të martën në mëngjes: “Nuk ka përçarje mes kryeministrit të Izraelit dhe presidentit.”

Trump bëri të ditur se SHBA ka kontribuar me 60 milionë dollarë për krijimin e qendrave ushqimore në Gaza, që do të menaxhohen nga qeveria izraelite dhe pritet të hapen “shumë shpejt”. Ai shtoi se edhe Bashkimi Evropian do të kontribuojë në këtë përpjekje për të përballuar krizën në rritje të urisë.

Zëdhënësja e Departamentit të Shtetit, Tammy Bruce, tha se çdo diskutim për të ardhmen e një shteti palestinez është i parakohshëm përderisa luftimet vazhdojnë.

“Pavarësisht nga konflikti – qoftë Rusia-Ukraina, Gaza apo ndonjë tjetër – nuk mund të mendosh për hapat e ardhshëm pa ndalur dhunën. Ende jemi në atë pikë. Për shkak të refuzimit të Hamasit për të dorëzuar armët dhe për të liruar pengjet, nuk jemi ende në fazën për të folur për të ardhmen,” u shpreh Bruce.