Analisti politik Donat Syla ka komentuar situatën aktuale në skenën politike të Kosovës duke vlerësuar zhvillimet brenda Partisë Demokratike të Kosovës dhe Lidhjes Demokratike të Kosovës.

Syla thekson se PDK-ja vazhdimisht po improvizon me lidershipin e saj, në pritje të kthimit të ish-presidentit Hashim Thaçi dhe ish-kryetarit Kadri Veseli nga Gjykata e Hagës. Ai përgëzon dorëheqjen e Memli Krasniqit nga pozita e kryetarit të partisë, ndërsa nënvizon se Bedri Hamza ka humbur legjitimitetin pas dështimit dy herë për të sfiduar Albin Kurtin për postin e kryeministrit. Megjithatë, sipas Syla, nuk ka arsye që Hamza të japë dorëheqje pas ndryshimeve të fundit në lidership, pasi secili në PDK po pret rikthimin e krerëve të tij nga Haga.

Analisti ngre shqetësim për LDK-në duke theksuar se për publikun mbetet mister “dora e fshehtë” që kontrollon kryesinë e saj dhe që vazhdon të justifikojë dështimet pas dy rezultateve katastrofale elektorale. Ai thekson se Kosovës i duhet një LDK e fortë, jo një parti në rënie të lirë, pasi performanca aktuale vetëm i konvenon kundërshtarit më të madh të saj, Vetëvendosjes. Sipas Syla, Vetëvendosja është e vetmja që përfiton nga dobësia e LDK-së, ndërsa PDK-ja nuk përfiton nga kjo situatë.

Pyetja esenciale, sipas Syla, mbetet: kush qëndron pas kryesisë së LDK-së dhe e ka kurthuar kaq keq partinë? /Kosova.info/