Kryetari i Komisionit për Ekonomi, Industri, Ndërmarrësi dhe Tregti, Ferat Shala, kritikoi Qeverinë për rritjen e vogël të pagave në sektorin publik, duke theksuar se kjo rritje është vetëm 6.8 euro, dhe ka ndodhur në një kohë të vështirë ekonomike për vendin. Sipas Shalës, Qeveria e ka përkeqësuar gjendjen ekonomike të qytetarëve përmes rritjes së tatimeve mbi pronën me 100 për qind për familjet dhe 200 për qind për bizneset.

Shala komentoi gjithashtu deklaratën e ministrit të Financave, Hekuran Murati, i cili pretendon se paga mesatare në sektorin publik është rritur me 18% në krahasim me vitin e kaluar, por Shala thekson se qeverisja aktuale ka shkaktuar rritje të energjisë për 120 për qind dhe një inflacion të lartë prej 35-40 për qind.

Ai kritikoi mungesën e projekteve të përfunduara infrastrukturore dhe faktin që asnjë nga investimet kapitale të premtuara nuk është realizuar. Shala gjithashtu ngriti shqetësimin për mungesën e ushqimit për ushtarët e FSK-së dhe përdorimin e praktikave të vjetra nga AKP-ja, duke theksuar se tenderët me një burim janë bërë normë.

Duke folur për pensionet, ai tha se rritja e bërë nga Qeveria nuk i përmbush nevojat ekonomike të pensionistëve dhe akuzoi Qeverinë për ndarje të padrejtë ndërmjet kategorive të dala nga lufta, duke e konsideruar këtë si shkelje të të drejtave të tyre themelore.