Një aeroplan ushtarak i Kinës është rrëzuar në një lagje të banuar në pjesën qendrore të Kinës, duke lënë të vdekur një person, raportojnë mediat e këtij vendi.

Aeroplani J-7 i ushtrisë kineze, ishte pjesë e stërvitjeve ushtarake në provincën Hubbei kur u rrëzua – duke shkatërruar disa shtëpi.

E si pasojë e rrëzimit ka humbur jetën një banor i lagjes ku u rrëzuar fluturakja, e dy tjerë u lënduan. Në anën tjetër, piloti që shpëtoi me lëndime të lehta trupore, ka arritur që me sukses të katapultohet dhe të hap parashutën.

Edhe piloti dhe civilët e lënduar janë dërguar me urgjencë në spitalin më të afërt për tretman, nga ku është bërë e ditur se gjendja e tyre shëndetësore është stabile.

Në një video amatore shihen shtëpitë e përfshira nga zjarri – që besohet të jetë si pasojë e rrëzimit të aeroplanit jo larg aeroportit të Siangyang në provincën Hubbei.

E siç raporton CNN, po hetohet shkaku që mund të ketë çuar te rrëzimi i fluturakes.