Rushit Rimanishta, mjek shqiptar që jeton dhe vepron në Suedi, ka ndarë një kujtim të veçantë dhe emocional për ndarjen nga jeta të Dr. Bujar Bukoshit, Kryeministrit të parë të Republikës së Kosovës dhe njëherësh një autoritet i padiskutueshëm në fushën e mjekësisë.

Në një postim, Rimanishta nuk ndalet tek kontributi politik i Bukoshit, për të cilin, siç thotë ai, “dihet pothuajse gjithçka”, por flet për figurën e tij si mjek. Ai ndan një përvojë personale nga viti 1988/89, gjatë kryerjes së shërbimit ushtarak në VMA (Akademia e Mjekësisë Ushtarake) në Beograd – institucioni më i lartë mjekësor në ish-Jugosllavi.

“Në një ditë kujdestarie në emergjencën e VMA-së, vërejta se stafi ishte në tension dhe prisnin një specialist të jashtëm për një rast të ndërlikuar në urologji,” kujton ai. Kur pyeti një koleg kroat se kush po vinte, mori përgjigjen: “Vendasi yt, zoti Bukoshi. Është një nga ekspertët më të mirë në vend.” Pas pak, një turmë e madhe specialistësh e rrethonte Dr. Bujarin ndërsa ai hynte në sallën e operacionit – aq e madhe, saqë vetë Rimanishta nuk arriti të afrohej për ta përshëndetur.

“Kjo është dhe ka mbetur fotografia ime për Dr. Bujarin,” shkruan ai me emocion duke përfunduar me fjalët: “Pusho i qetë, doktor!”

Ky kujtim tregon qartë se përveç figurës politike, Bujar Bukoshi mbetet një simbol i respektuar i profesionit të mjekut – një emër që ka lënë gjurmë të thella në kujtesën e kolegëve dhe pacientëve. /Kosova.info/