Koordinatorja Nacionale për Zgjedhje dhe njëherazi prokurore në Zyrën e Kryeprokurorit të Shtetit, znj. Laura Pula, mori pjesë si paneliste në tryezën me temë “Institucionet përballë dezinformimit në periudhë zgjedhore”, në ditën Nderkombetare të Verifikimit të Fakteve në kuadër të së cilës u prezantua edhe raporti mbi reziliencën ndaj dezinformatave gjatë proceseve zgjedhore në Kosovë. Ky raport është hartuar me mbështetjen e Bashkimit Evropian dhe është organizuar nga ADS/Hibrid.info.

Me këtë rast, znj. Pula vlerësoi punën e bërë në hartimin e raportit duke theksuar rëndësinë e trajtimit të dukurisë së dezinformimit gjatë periudhës zgjedhore, si një prej sfidave serioze që mund të ndikojnë në informimin e drejtë të opinionit publik dhe në integritetin e proceseve demokratike.

Gjatë diskutimit, Prokurorja Pula foli për sfidat me të cilat përballet Prokurori i Shtetit në trajtimin e rasteve që ndërlidhen me dezinformimin në procese zgjedhore. Ajo theksoi se ndër vështirësitë kryesore mbeten përcaktimi i përgjegjësisë penale, vendosja e kufirit ndërmjet dezinformimit dhe lirisë së shprehjes, si dhe dëshmimi i qëllimit kriminal apo i elementeve të përgjegjësisë penale.

Në këtë kontekst, znj. Pula nënvizoi se sfidë e veçantë paraqet edhe identifikimi i autorëve të përmbajtjeve dezinformuese, për shkak të përdorimit të profileve të rreme apo anonime, rrjeteve private virtuale, si dhe shpërndarjes masive të përmbajtjeve nga shumë përdorues, shpesh pa mundësi të qartë për të përcaktuar burimin origjinal. Po ashtu, ajo theksoi se përfshirja e platformave globale krijon vështirësi në trajtimin e këtyre rasteve, që gjë kërkon bashkëpunim jo vetëm ndërinstitucional por edhe bashkëpunim juridik ndërkombëtar.

Tutje, Prokurorja Pula theksoi se amplifikimi i dezinformatave, përmes shpërndarjes së koordinuar të informacionit të rremë, ka prodhuar në shumë raste ndikim të konsiderueshëm në opinionin publik, me theks të veçantë te votuesit gjatë periudhave zgjedhore.

Në përmbyllje, znj. Pula shprehu gatishmërinë për bashkëpunim me të gjithë akterët institucionalë dhe organizatat relevante, me qëllim të forcimit të përpjekjeve të përbashkëta për të garantuar informim të drejtë dhe të saktë të opinionit publik gjatë proceseve zgjedhore. /Kosova.info/