Lidhja Demokratike e Kosovës (LDK) ka shënuar një rritje të konsiderueshme të mbështetjes në komunën e Suharekës duke përmirësuar rezultatin e saj në përqindje krahasuar me zgjedhjet e 28 dhjetorit 2025.

Sipas rezultateve aktuale, LDK ka arritur të sigurojë 28.54 për qind të votave në Suharekë, ndërsa në zgjedhjet e fundit parlamentare kishte marrë 19.95 për qind. Kjo paraqet një rritje prej 8.59 pikë përqindjeje duke e konsoliduar pozicionin e saj si forca e dytë politike në këtë komunë.

Ky rezultat bëhet edhe më domethënës po të merret parasysh se në këto zgjedhje kanë votuar rreth 11 mijë qytetarë më pak sesa në procesin zgjedhor të dhjetorit 2025, çka e bën rritjen e LDK-së edhe më të theksuar në aspektin përqindor.

Një nga faktorët që konsiderohet se ka ndikuar në këtë rezultat është kandidatura e Blerim Kuçit për deputet. Si figurë e njohur politike dhe publike në Suharekë, ish-komandant i Brigadës 123 dhe ish-zyrtar i lartë institucional, Kuçi ka zhvilluar një fushatë aktive duke u fokusuar në tema që lidhen me zhvillimin ekonomik, mbështetjen e prodhuesve vendorë, sigurinë, stabilitetin institucional dhe përfaqësimin e interesave të qytetarëve në Kuvend.

Njohja e tij e gjerë në komunë dhe angazhimi i vazhdueshëm gjatë fushatës zgjedhore duket se kanë kontribuar në mobilizimin e elektoratit të LDK-së, por edhe në tërheqjen e votuesve të rinj.

Megjithatë, njohësit e proceseve zgjedhore vlerësojnë se rezultati është produkt i një kombinimi faktorësh, ku përveç kandidatëve individualë kanë ndikuar edhe puna e strukturave lokale të partisë, angazhimi i aktivistëve dhe zhvillimet politike në nivel qendror.

Pavarësisht kësaj, rritja e LDK-së në Suharekë konsiderohet si një nga rezultatet më të dallueshme të partisë në nivel lokal, ndërsa Blerim Kuçi shihet si një nga emrat që i ka dhënë peshë dhe energji listës së saj në këtë komunë.

Rezultati i arritur tregon se, edhe në një proces zgjedhor me pjesëmarrje më të ulët të votuesve, LDK ka arritur të konsolidojë bazën e saj elektorale dhe të rrisë mbështetjen në Suharekë duke konfirmuar një trend pozitiv krahasuar me zgjedhjet e mëparshme. /Kosova.info/