Profesori universitar Blerim Latifi, ka komentuar lidhur me krizën energjetike në Kosovë. Ai ka thënë se dikush në sistem po na saboton në mënyrë të fshehtë, duke e quajtur këtë si ide të rrezikshme.

Sipas Latifit, për ta zgjidhur krizën, kryeministri Albin Kurti, duhet të t’ua tregojë “derën të gjithë atyre që i shkojnë në zyrë me tregime dhe teori sabotazhi”.

Reagimi i Latifit në Facebook:

Budallakia ma e madhe që një qeveri mund ta bëjë kur ballafaqohet me probleme të tilla si kriza energjetike, nëpër të cilën po kalojmë, është t’i qaset asaj me teorinë e sabotimit. Ideja se ne jemi në rregull, por dikush në sistem është duke na sabotuar në mënyrë të fshehtë, është ide e rrezikshme, me karakter totalitar, që nuk shpie askund tjetër përveçse në gjueti shtrigash.

Nëse kryeministri e ka vullnetin e duhur për t’u ballafaquar racionalisht me këtë krizë, gjëja e parë që duhet të bëjë është t’ua tregojë derën të gjithë atyre që i shkojnë në zyrë me tregime dhe teori sabotazhi.

Teoritë e sabotazhit na duken joshëse, sepse ato na shfajësojnë nga përgjegjësia jonë për një problem që ka shpërthyer në sistem, por përtej joshjes ato janë të destinuara të mos zgjidhin asgjë, por vetëm t’i mbulojnë disa probleme duke i krijuar disa të tjera.