Kompania dyshohet se ka konkurruar në tenderë me dokumente të falsifikuara në dy spitale të Kosovës, raporton Kosova.info.

AVONET, pas monitorimit të dy procedurave të prokurimit në Spitalin e Përgjithshëm të Pejës dhe atë të Gjilanit, ka identifikuar dokumente të dyshimta në ofertën e një operatori ekonomik. Në dosjet e dorëzuara figurojnë një CV, një kontratë pune dhe një diplomë, të cilat rezultojnë të jenë përdorur pa dijeninë e personit që figuron si autor i tyre.

Personi në fjalë, dizajner i diplomuar, ka konfirmuar për AVONET se nuk ka qenë asnjëherë në marrëdhënie pune me kompaninë A.R.F. SHPK dhe se nënshkrimi i tij është përdorur pa autorizim. Ky fakt çon në dyshime serioze për falsifikim të dokumenteve dhe keqpërdorim në proceset e prokurimit publik, duke cenuar konkurrencën e drejtë dhe integritetin e procedurave.

Duke u mbështetur në këto gjetje, AVONET ka dorëzuar kërkesë zyrtare në Prokurorinë e Shtetit për nisjen e hetimeve. Dyshimet përfshijnë deklarim të rremë nën betim, mashtrim dhe keqpërdorim në prokurim publik, keqpërdorim të besimit dhe falsifikim dokumentesh, sipas Kodit Penal të Kosovës.

Organizata i ka kërkuar gjithashtu të dy spitaleve që të ndërmarrin hapat e nevojshëm për inicimin e procedurave të diskualifikimit pranë Organit Shqyrtues të Prokurimit, në përputhje me nenet 99 dhe 65 të Ligjit për Prokurimin Publik.

AVONET thekson se do të vazhdojë monitorimin e prokurimit publik dhe publikimin e rasteve që rrezikojnë interesin e qytetarëve, duke kërkuar përgjegjësi dhe transparencë nga institucionet kompetente.