Në prag të zgjedhjeve, Qeveria e Kosovës ka vendosur të ndajë nga buxheti i shtetit 100 euro për çdo fëmijë nga 0-16 vjeç dhe pensionist. Ky veprim, i kritikuar ashpër nga Këshilli për Mbrojtjen e të Drejtave dhe Lirive të Njeriut (KMDLNj), shihet si një përpjekje e qartë për të blerë vota dhe për të ndikuar në procesin zgjedhor.

Sipas KMDLNj-së, ndarja e ndihmave pa përfillur kriteret sociale përbën korrupsion institucional dhe shpërdorim të buxhetit publik. Ndihmat, të cilat përfshijnë të gjithë fëmijët pa dallim statusi ekonomik, madje edhe fëmijët e zyrtarëve të lartë, konsiderohen një masë populiste që nuk ndikon në përmirësimin e cilësisë së jetës së qytetarëve.

KMDLNj thekson se pensionistët janë ndër grupet më të cenueshme, por edhe më të manipuluara. Qeveria ka rritur pensionet me vetëm 20% gjatë mandatit të saj, një masë që është larg përputhjes me shkallën e inflacionit dhe rritjen e çmimeve të shportës familjare. Mosindeksimi i pensioneve, siç parashikohet me ligj, ka sjellë zhvlerësimin e tyre me 30-40%, duke e ulur realisht fuqinë blerëse të pensionistëve.

Në një kohë kur çmimet e energjisë, tatimi në pronë dhe produktet bazë janë rritur ndjeshëm, shumica e familjeve kosovare janë të detyruara të marrin kredi, shpesh nga institucionet mikrofinanciare që vendosin interesa të larta. Kjo ka krijuar një cikël varfërie dhe presioni financiar për qytetarët.

KMDLNj bën thirrje për hetim të bazës ligjore të këtij vendimi dhe paralajmëron qytetarët të jenë të kujdesshëm ndaj premtimeve elektorale për rritje pagash dhe pensionesh. Sipas KMDLNj-së, këto oferta janë shpesh të pambështetura në realitetin buxhetor të Kosovës dhe nuk mund të realizohen.

Organizata i fton qytetarët të votojnë me përgjegjësi dhe të mbështesin vetëm ato propozime që kanë bazë reale për t’u përmbushur. Ndërkaq, kërkon nga subjektet politike të jenë të ndershme në premtimet e tyre dhe të mos abuzojnë me ndarjen e ndihmave për përfitime politike.

KMDLNj përfundon duke theksuar se qeveria duhet të fokusohet në zgjidhje afatgjata dhe sistematike për përmirësimin e jetës së qytetarëve, dhe jo në masa të përkohshme që synojnë manipulimin elektoral. /Kosova.info/