Fermerët e Kosovës kërkojnë nga Ministria e Bujqësisë, e Pylltarisë dhe e Zhvillimit Rural (MBPZhR), rikthimin e Panairit të gjedhit, një aktivitet që dikur luante një rol të rëndësishëm në promovimin e blegtorisë dhe të bujqësisë në vend.

Sipas fermerëve, rikthimi i këtij panairi do të ishte një hap i madh për të përmirësuar shkëmbimet e përvojave dhe për të nxitur zhvillimin e sektorit bujqësor.

Bedri Ajupi, një fermer nga Dragashi, ndau përvojën e tij pozitive nga pjesëmarrja në një panair të mëparshëm të gjedhit.

“Fal pjesëmarrjes në një panair dhe zënies së vendit të parë aty, u motivova të merrem me gjedhe,” tha ai duke theksuar rëndësinë që këto aktivitete kanë për të nxitur interesin dhe për të përmirësuar praktikat bujqësore.

Ai shtoi se panairet jo vetëm që promovojnë blegtorinë, por gjithashtu ndihmojnë fermerët të njihen me teknologji të reja dhe pajisje bujqësore.

Fermerë të tjerë nga pjesë të ndryshme të Kosovës ndajnë entuziazmin për rikthimin e panairit.

Erenik Limani nga Keqekolla e Prishtinës, një fermer që merret me blegtori dhe bujqësi, thekson rëndësinë e panaireve për lidhjet me fermerë të tjerë dhe për shkëmbimin e eksperiencave të suksesshme.

“Ne duhet të kemi mundësinë të takojmë fermerë nga i gjithë vendi, të diskutojmë sfidat dhe të mësojmë njëri nga tjetri,” tha Limani.

Përveç gjedheve, panairet ofrojnë një platformë të shkëlqyer për ekspozimin e makinerive dhe të pajisjeve moderne bujqësore.

Feim Havolli, një tjetër fermer nga rajoni i Podujevës, thotë se përmes këtyre panaireve ka arritur të zbulojë teknologji të reja që i kanë lehtësuar punën në fushën e bujqësisë.

“Panairet janë një mundësi për të parë risitë dhe për të investuar në makineri që ndihmojnë në rritjen e prodhimit dhe në kursimin e kohës,” tha Havolli.

Fermerët po shpresojnë për rikthimin e panairit të mbështetur nga institucionet përkatëse, duke e parë këtë si një hap të rëndësishëm për të mbështetur fermerët dhe për të forcuar sektorin bujqësor në tërësi. /Kosova.info/