Anëtarësia e PDK- së, në Vushtrri, qytetarët dhe Ferit Idrizi e fituan garën për kryetar komune pas një angazhimi maksimal.

Shkruan: Bahri BIVOLAKU

Konsideroj se për të qenë fitorja e plotë dhe përmbajtësore dhe e cila do të reflektonte edhe në vullnetet elektorale nacionale, duhet dëshmuar përkushtimin dhe devotshmërinë për të pasur një qeverisje të mirë nga djem e vajza pa hipoteka negative nga  e kaluara, me integritet dhe novator të mënyrës së të bërit politikë.

Vetëm kështu i japim kuptim fitores së ditës së djeshme. Fitore e arritur nga angazhimet e shumë veprimtarëve përkushtimin e të cilëve në të kaluarën e kemi mbuluar e anashkaluar padrejtësisht.

Fitores i humb kuptimi nëse zgjidhet rrugë tjetër e veprimit, rrugë kjo e cila nuk e garanton mirëqeverisjen dhe respektimin e meritokracisë, me tendencën e mbulimit të punës nga ca karaktere të cilat vetëm interesi i ekzalton.

Jam i interesuar për të arritur fitoren e plotë e jo gjysmake.

Fitorja e plotë i jep imazh pozitiv partisë në nivel nacional dhe rritës e konsolidimit të saj.

Partitë apo degët e tyre, nuk duhet të bëhen lavatriqe për individ për  të larë të kaluarën e njollosur me hajni e korrupsion.

Ka ardhur koha që në Kosovë, në skenën politike të saj të lirohen vullnetet e uzurpuara nga njerëzit e tillë, për ta bërë popullin më të lumtur. Kacavarjet në muret e politikës nga ziliqarët, hileqarët dhe njerëzit pa personalitet e karakter janë një kotësi e momentit që shëmton vullnetet qytetare, shëmton vlerat më të çmuara të tij dhe tregon jo vlerë e civilizim.

Nëse dikush mendon të qeverisë me karaktere të tilla e dëmton shumë subjektin. Unë vet do shpreh revoltën publike edhe nëse ka të bëjë me subjektin të cilit i takoj.

Gjithmonë ka një rrugë edhe për ata që nuk kanë menduar se vijnë kohë të reja dhe assesi politika nuk mund të jetë shpëtimi i ndërgjegjes së tyre. Atyre mund t’u thahen flokët, t’u shtohen rrudhat ballit, por ndërgjegjja u mbetet e njëjta.

          Nuk ka progres:

Kur e ⁄i padrejti flet për drejtësi; 

Kur joatdhetarja ⁄ i flet për atdhetarizëm; 

Kur e⁄ i paedukuari flet për edukatë; 

Kur e⁄ i pakulturuari flet për kulturë; 

Kur ajo ⁄ ai pa asnjë libër të lexuar flet për politikë; 

Kur e ⁄ i pamoralshmi flet për moral; 

Kur e⁄ i padituri flet për dituri…. 

Hajni / hajnesha të flet për ndershmëri……!