Analisti Petrit Dibrani ka reaguar ashpër ndaj deputetëve të Kuvendit të Kosovës, të cilët, sipas tij, po marrin paga pa kryer punën për të cilën janë zgjedhur. Ai i ka quajtur mbi 90% të tyre “analfabetë” dhe ka kërkuar që mjetet e përfituara padrejtësisht t’i kthehen buxhetit të shtetit.

“Ktheni paratë nga pagat e marrura: ju deputet pa-Kuvend, që jeni mbi 90% analfabet!”, ka deklaruar Dibrani.

Duke u ndalur te roli i qytetarëve, ai tha se shqiptarët e Kosovës, të cilët kanë sakrifikuar ndër shekuj dhe që sot janë taksapaguesit kryesorë, nuk duhet të mbahen peng i një politike që, sipas tij, karakterizohet nga mediokriteti dhe paaftësia.

“Ne, si shqiptarë të tokës dardane, të larë ndër shekuj me gjakun e shqiptarëve dhe të gjithë qytetarët bashkërisht, pavarësisht nacionalitetit, jemi taksapagues dhe gjenerues kryesor të buxhetit të shtetit, në Republikën Parlamentare të Kosovës”, u shpreh ai.

Në fund, Dibrani shtoi se: “Mediokritetët e bashkuar me analfabetë janë pazotësia që po duartroket dhe po na shkatërron tash e 25 vjet.” /Kosova.info/